سخارة العكربا

Mohammed El Filali20 سبتمبر 2020آخر تحديث :
سخارة العكربا

تقول حديدان محطوط
شعرو واقف ماممشوط
حالتو بحال زعطوط
شارد بحال شي مرفود

ديما تالف او ودنيه مطنشين
يلقط بيهم كلام الحاضرين
موجود في وسط السامعين
ويركز على الكليمات الغابرين

هو موظف في وسط الإدارة
معروف مزيان بهاذ الضسارة
كتافو خاويين وفيه لفشارا
تعطيه دوسي عول على الخسارة
عقلو مطمس تقول فيه النجارة
بحال الا عايش غير بالبيصارة

لكنو بارع في وظيفة استثنائية
الكلام تايوصل بحال اللحاكية
ملوية في زيف وعلى الفورية
توصل لمولاها بهاذ السخونية
هي مواصفات صعيبة شويية
“تشكامت” تطورات حتى هي
صبحات تلقن في الكلية
على شكل علوم استخبارتية
ماليها معروفين في مكاتب إدارية
ماشي بحال خونا خارج الرسمية

هو عمل صعيب او شاق
خونا به عاق
جا معاه او فاق
لسانو هادشي لي داق

الموظفين تشكاوا حتى ملو
هو ساكت او مبرد دمو
خدمتو يعطيوها لموظف بزز منو
يحدر راسو ويكمد غمو

النهار او ما طال يتساقل
اسمع سميتو ويتغافل
في حاجة الخدمة مايتفاعل
او في “لحريك” ديما حاضر

واحد خدام بكتافو
لاخور مخدم غير لسانو
والثالت مكلمين عليه ناسو
الباش ديال العرس من عند خالو

. 18/09/2020
نوالدين بن شقرون

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

error: Content is protected !!