
عندو هري عامر مضخم وكبير
الخير فايض عليه بزاف اوكثير
لكن الريال مايزهقش اوبخيل
معروف في الحومة وعند الغير
مخدم ثلاثة الناس من قديم
هذا حمان الاشفتيه تقول هبيل
متلف الإدارة والجبايات المحلية
ديما تايبكي على السلطات الرقابية
خدام كورجا بدون دفاتر حسابية
تايخلص الخداما بالطريقة الأسبوعية
لاترسيم لا تسجيل في الصناديق الاجتماعية
إلا مرضو يقطع ليهم من الحصة الاجرية
العمرة أصبحت عندو رسمية وسنوية
يطوف على الكعبة ويزيد في البكائية
يطلب الله يعطيه ويزيدو من الخيرية
لكن واش مافكرش أنها قمة النفاقية
فلوس العمرة هاذوك راه عرق العمالية
الدين واضح وبعيد على هذا الانتهازية
هاذي قصة حمان في سوق الاستغلالية
هي سوق واسعة وتزيد في الاستقطابية
خرق القانون وهضم الحقوق العمالية
أصبح عادي وبدون عقوبات زجرية
هذا السوق زاد تعززات بناس الحقوقية
تعمدو الخلط بين القانون والأعمال الخيرية
اش نقولو لحمان في ظل هذه الوضعية..؟
الفقيه لي تمنينا بركتو والتقية
دخل للجامع ببلغتو بلا حشمية
نورالدين بن شقرون















































