الضسارة ” بالفرنسوية”

Mohammed El Filali17 سبتمبر 2020آخر تحديث :
الضسارة ” بالفرنسوية”

مشات معروضة عند صاحبتها
خلات بنتها عند لوستها
لأول مرة بغات تقابلها
اللوسة كبيرة والوقت تجاوزتها

لبنية عندها اربع سنوات
تتقرا في الروض عند “الأخوات”
عفوا ” ليسور” عند البعثات
بحال أولاد الكبار والبهاوات

وصوها تتكلم معاه بالفرنسوية
جاها الضحك على الفورية
قالت ليهم بطريقة استهزائية
غاب علي اني بنت الكلية
وعندي الاجازة منذ الازلية
في الفلسفة والعلوم الإنسانية
انا راه حدي الإبتدائية
خرجت من التحضيري دون انتظارية
ودخلت لدار المعلمة الفاسية
تعلمت الطرز والفصالة حتى هي
علاه فين مشات لغتنا الاصلية
حتى نتكلم معها بالأجنبية

البنية تاطير بحال بورزان
خافت عليها من حريق الفران
طلعات تجري فوق الطلقان
طلامت “الموبرا” توسخو مزيان
بكات عليهم بحال الولهان
خافت عليهم من الفقدان
يحكيوا قصص في الوجدان
تاريخهم طويل في هاذ المكان
كلشي دا حقو من الخسران
اش من تريكا في هذا الزمان

تفكرات زوجها الله يرحمو
كيف ربى الاولاد غير بفمو
الدري يلصق غير بشوفا منو
يمشي يتخشى في شون مو

حيت كملات وعيات من الشطون
جات عند عمتها تقلب على الفضول
تتكلم بالفرنسية اوماعليها لوم
المرأة تجاوبات معها على الفور
بحال ش” فو كيد” مع الكور
ضحكات عليها البنية على طول

“ماتونت تي نو بارل با ” فرونسي
“نو” ابنتي ” جو سوي” عربي
وهاذ الشكل ديالكم راه غربي
وبلادنا بعيدة بزاف على بواتييه

رجعات الأم من سهرتها الاحتفالية
دخلات فيها اللوسة بكل اندفاعية
ضسارة هذا البنت راه كثيرة علي
انا غير أمية مانفهمش الفرنسوية
علميها لغة البلاد وهي ضرورية
نتعاونو معاك عليها في التربية
في انتظار ماتجيك المربية الفليبنية
بحال اصحاباتك ديال البورجوازية
كتافكوم راه بردو واسمحي ليا
الاولاد لازمهوم الوقفة المخزنية

 

14/09/2020
نوالدين بن شقرون

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

error: Content is protected !!