تفاعلا مع الوضع الكارثي الذي تتخبط فيه مدينة القنيطرة على جميع المستويات، سواء الرياضية أو الإقتصادية، أو الإجتماعية…، تواصل فصيل حلالة بويز مع الجماهير عبر مقال كتب بالدارجة المغربية يحمل عنوان مدينة الدوزيام سيري، وهذا النص الكامل للمقال :
” هذا المقال سيكتب بالدراجة المغربية على غير عادتِنا و ذلك من أجل إيصال مضامين هذا البلاغ لكافة شرائح مدينة القنيطرة المظلومة و المغضوبِ عليها :
تا شي حاجة فهاد المدينة ما كاتزيد للقدامْ، و لكن العكس كلشي كايرجع باللور و السبب ديما كان واضح و لي هو المسؤولين على تدبير و تسيير القنيطرة.
المدينة ليوم ولات فحال أحد المدن لي كان فيها الحرب، لا مرافق عمومية، لا ملاعب، لا دور الشباب و الثقافة، لا مسارح، و لا وسائل النقل من حافلات، و لا حتى اهتمام بالفريق الرياضي الأول لي هو النادي الرياضي القنيطري.
شلل كبير كاتعيشوا القنيطرة، و تا شي جهة ما قدارت تحرك و تبين على حسن النية ديالها، الطلبة كايضيعو فالحصص ديالهم بسبب غياب المواصلات، و تجار و عاملين كايعيشو الفقر بسباب التوقيت الظالم و إغلاق جميع طرق المدينة بسبب قنطرة صغيرة لي ماقدرش المجلس البلدي يحل المشكلة ديالها كأننا أمام حدث تاريخي لي هو بناء قنطرة بطول 3000 متر.
بالإضافة إلى هذا النادي القنيطري كايعيش أيام سوداء بسباب التسيير العشوائي من طرق الرئيس الحالي برفقة المحبوبة ديالو لي خرجات على فريق كرة السلة، و ما قدروش يوضحوا للرأي العام شنو طاري فالفرقة، وحتى التقرير المالي خلاهم يطالبو بتأخيره للشهر المقبل باش يسدو التقابي لي فيه و الخروقات لي تقدر تكون مكشوفة، و هاد الوضع ما حرك تا مسؤول فالمدينة من غير عملية التحكم في الفريق من طرف الحزب الحاكم لي باغي النادي القنيطري يبقى تحت السيطرة ديالو ما دام هو الصورة اللولة ديال المدينة.
هاداكشي لي طاري فالمدينة هو النفس الشيء لي طاري فالكاك، العشوائية و الفساد سيطر على القنيطرة بدون أي حسيب و رقيب، حتى من الإعلام المحلي و الوطني متستر على القضية، حيث واقيلا هادي هي المدينة لي مكلف بها السي الوزير … المهم هو أن فكرتنا ليوم هي نكونو بمثابة إعلام بديل و نصنعوا ضجة وطنية لي الغرض منها هو إيصال صوتنا لأكبر الجهات فبلادنا، حيث تا الوقفات ما يمكنش يدارو حالياً في ظل الوضع المعروف و المثال هو قمع أصحاب القاعات الرياضية أمام العمالة.
هادشي لي خلانا نفكرو بأننا ناخدو البادرة و نوصلو صوتنا براسنا، و لهذا فأي واحد من المتضررين بالوضع الحالي لمدينة القنيطرية، يدير فيديو كايعبر فيه بأي طريقة بغا يبعث الفيديو فالصفحة الرسمية للمجموعة أو فالإيمايل.
و هاد الرسالة موجهة للجميع من : تلاميذ، طلبة و طالبات، عمال، تجار، أصحاب المتاجر و العاملين فيها، أباء و أولياء التلاميذ، الطلبة المتضررين، جمهور النادي القنيطري، الموهوبين الضائعين بسبب انعدام تواجد المسارح و دور الثقافة و الشباب و ما غير ذلك.
و نطالب أيضاً من الصفحات القنيطرية الانخراط فالعملية، و أي واحد ما قدرش يسيفط الفيديو ديالو يحطو فالفايسبوك الخاص ديالو ويدير هاشتاغ
# مدينةـ الدوزيام _ سيري .
هاد الأسبوع أيكون خاص بالتعبير على الرأي ديالنا و من ورا مانحطو هاد الفيديوهات لولين، أيكون الأسبوع القادم خاص بتصوير جميع الطرق المهمشة، انعدام المرافق و الملاعب الرياضية و إيصال داكشي لي بصح كاتعيشو المدينة، فالمرجو منكم الإستعداد و الوقوف وقفة الرجل الواحد.
# مدينةـ الدوزيام _ سيري
فصيل حلالة بويز
