في صغري كنت مبلي بالمقابلات الكروية
نفيق في الظلام ونهرب من المسؤولية
السخرة والمقدية من الصباح حتى العشية
تسللت لغرفة باسيدي نطلع على الوضعية
لقيتو رجع ينعس بعد الصلاة الفجرية
هاذي فرصة نخرج قبل مايعيقو بيا
لكن لقيت “للا” واقفا بحال المخزنية
حصلاتني متلبس وعطيتها للسكوتية
قبلت إيديها وراسها بدون ترددية
اعطاتني خنيشة فيها كريصات وملوية
حطات على راسي الوصلة الاعتيادية
جوج خبيزات شعير والباقي عجينة عادية
حاولت نرفض لكنها غوبشات فيا
راه الحال باقي على هذا العملية
الفران باقي ساد في هاذ النبورية
حط لوصلة قدام بابو وبلا نقاشية
اوحاول ترجع قبل وقت العكبية
باسيدك موجد جوج كرعين وطنجية
لابد من خبيزات الشعير سخان شويية
كملت مهمة “للا” بكل استعجالية
اتصلت بصحابي بالسكات وبدون حسية
كمل العدد اوشدينا طريق اوطيل المامونية
وصلنا لباب الجديد قبل الشروقية
احتلينا نص التيران وعلمناه بالجبصية
حيت غير تزيد شويية اوتشوف لعمورية
تحكينا على هادشي مع مرور الوقتية
حليت الخنيشة وشاركتها مع الحضورية
بقى لي طرف صغير من ديك الملوية
التيران تراب اوقاصح بلا عشبية
الكوداص ثقيل والهونكا حتى هي
شدينا بلايصنا في انتظار الصفارة لولانيا
الماتش الأول كان مع المشاغل الدراسية
استغرق سطاش لعام دون أشواط إضافية
الخصم كان صعيب اولازمو الحذرية
تغفل تخرج بحمرا وعلى الفورية
احفروك واحطوك على الهامشية
تنسى فيها الفانت والسيزووات الهوائية
ومع الوقت تغيب على الملاعب الكروية
وتديك موجة الحشيش والهيبية
الحمد لله كلشي داز بلا إشكالية
هاذي قصتنا مع هاذ المقابلة الاقصائية
ربحناها بزز رغم الأخطاء التحكيمية
صفر الحكم وفرحنا بحال الصبيانية
ماتشنا الثاني كان مع الحياة العملية
جمعنا المدرب ورسم لينا الخطة التكتيكية
وصنا على تعزيز الخطوط الدفاعية
حيت الخصم عندو عناصر هجومية
بدات المقابلة ضعيفة دون تشويقية
الراتب هزيل حدو إسد الرمقية
الخدمة كثيرة وكأننا في الاستعبادية
صبرنا غير باش نتفادوا البطالية
مع الوقت صعدنا من طاقتنا الهجومية
سجلنا هدف ولا اروع في التقنية
كسبنا الثقة في النفس وكانت ضرورية
تحسنات اوضاعنا وتحققات ملفات مطلبية
قويينا من وجودنا بالاستمرار في التكوينية
عام على عام اخدينا المسؤولية
كمل الماتش والاشواط الإضافية
ثلات عقود أوزيد سنوات حتى هي
ربحنا بصعوبة وبالقدفات الترجيحية
عند رجوعنا تفاجئنا بتغيرات جدرية
الخطارات ردموهم اوغابو على الوجودية
باب الجديد عمر بالبنايات الفندقية
السيارات كثرو ومن أنواع خيالية
مشات الدوفين و R16 الدبلوماسية
و R4 صبحات للجولات الاستعراضية
باب المامونية تغير وأصبح غريب علي
للارقية عمرات حوانت وقهاوي بلا حسابية
دخلنا للحومة وتفكرت السخرة الصباحية
اتجهت للفران بسرعة دون انتظارية
لقيت كلشي تبنى وأصبح قيسارية
اش نقول لباسيدي لتفسير الوضعية
مراكش 24/08/2020
نورالدين بن شقرون
باسيدي: جدي
للا: جدتي
النبورية: الصباح الباكر
العكبية: الفطور الثاني
