مات اباه وتكلف بالدار
امو وجوج خواتات كبار
الحسين شاب ضعيف الحال
كملوها زوجوه ببنت الخال
قالو اكتفوه ماحدو صغير
لكن مادارو فيه خير
مشاكل العيالات تزيد اوكثير
قرر يستقل مع مراتو في الحين
سول على الشقق الاقتصادية
لقاهم ب 25 مليون كلا هي
هذا الثمن بعيد على هذا النوعية
او مامكتوب في اللوحات الاشهارية
هذا منتوج لضعاف الحالة الاجتماعية
مدعماه الدولة للمستثمرين في العقارية
وعلمو عليه في النشرات الإخبارية
قالو ليه هادشي عرفناه منذ الازلية
الخطبة في التلفزيون بعيدة على الواقعية
راه المغرب هذا ماشي دولة اسكندنافية
كمدها وخرج بحال إلا حماق
فين كان مخبي عاد عاق
ناعس في دارهوم عاد فاق
لابد يشوف البنك قبل مايغراق
درسو ملفو اوجاوبوه في الحين
مانضو ماتسمح بكامل التمويل
وافقو ليه على 22 مليون لاغير
خرج فرحان والباقي ايكون فيه خير
مراتو كلمات اباها على الفورية
قبل اسلفهوم الباقي بلا ترددية
الحمد لله بدات تحيد الضبابية
ضمنو المحل وتحلات الاشكالية
ارجع اكمل المسائل الاجرائية
لكنو تفاجئ بمبالغ غير توقعية
وغير مكتوبة في العقود الالتزامية
لازمو ست ملايين بلا انتظارية
هي فلوس زايدة وعادية
كل الناس في راسهوم وعن رضائية
تاي احطوها بكل روح رياضية
المنعش العقاري لقى ليها التفسيرية
هي خلاص الخدمة الغير الهيكلية
لصالح حرف البناء من هاذ النوعية
اسمو ” النوار” وخارج على التصريحية
او تحت الطبلة وخارج الرسمية
فلوس ” كاش” وكلها ورقية
تشد عليها غير ” بون” بلا توضيحية
المهم هي مسرحية مخدومة ومحبوكة
الدولة مغمضا عينيها حيث مغلوبة
لوبيات العقار تبقى غير محكومة
المواطن داخل لهاذ اللعبة المشؤومة
انتفظ اوغوت وخرج بلاعقلية
هاذي راه السرقة في عز النهارية
غوت انت وعمك صباح حتى المسائية
المواطن قابل هاذ المسرحية الهزلية
الحسين بقى في دارهوم العائلية
اوضغط على مراتو تقبل الوضعية
نورالدين بن شقرون – أخبار الفجر المغربية
